Memleket basshysy Nursultan Nazarbaevtyń jańa áleýmettik bastamalarynda kókeıtesti máselelerdiń qamtylǵandyǵyna kóz jetkizdim. Onyń ishinde soltústik óńirlerdi gazdandyrý máselesine erekshe toqtalǵym keledi.
Shyndyǵynda, bizdiń eldiń shıkizat qory mol ekeni málim. Elimiz táýelsizdik alǵaly beri gaz óndirý 6 eseden asa ósti, bul kórsetkish arta beretindigi de kúdik týdyrmaıdy. Al gazdandyrý tek 50 paıyzǵa ǵana jetti. Elbasynyń ózi ortalyq jáne soltústik oblystardyń áli de gazsyz otyrǵandyǵyn atap ótti. Bul olqylyqtyń ornyn toltyrý úshin Prezıdent Qaraózek – Jezqazǵan – Qaraǵandy – Temirtaý – Astana baǵytymen magıstraldy gaz qubyryn tartý týraly bastama kóterip otyr. Bul – jańa jumys oryndarynyń ashylýyna, kásipkerliktiń órkendeýine de yqpal etetin joba. Endi kógildir otynnyń bizdiń Kókshetaý qalasyna da jetetindigine shúbá keltirmeımin.
Eldi gazdandyrýdyń ekologııalyq mańyzdylyǵyna da erekshe toqtalǵan abzal. Gazben jylytý júıesine kóshý qalalar men eldi mekenderdi artyq lastanýdan qutqarady. Prezıdenttiń aıtýynsha, tek Astananyń ózinde aýadaǵy zııandy qaldyqtar 6 esege azaıǵaly otyr.
Gazdandyrý aýyldan údere kóshýshilerge de tejeý bolyp, eldi mekenderde agroóndiristik keshendi damytý baǵdarlamasy boıynsha azyq-túlik qaýipsizdigin qamtamasyz etýge de yqpalyn tıgizeri sózsiz.
Bir sózben aıtqanda, Prezıdenttiń bes áleýmettik bastamasy áleýmettik memleketti qalyptastyrýǵa jáne Qazaqstan halqynyń ál-aýqatyn arttyrýǵa baǵyttalǵan úlken qadam dep esepteımin.
Ábiljan HUSAIYNOV, Aqmola oblysynyń qoǵamdyq keńes múshesi, «Aýyl» HDPP» QB Aqmola oblysy boıynsha tóraǵasy
KО́KShETAÝ